Монголын үндэсний VII жембори буюу скаутуудын майхант цугларалт Баян-Өлгий аймагт өчигдөр эхэллээ. Дөрвөн жилд нэг удаа болдог энэ үйл ажиллагаанд 21 аймаг, 9 дүүрэг, гадаадын 13 улсын скаутууд оролцож байна. Монголын скаутын холбоо энэ удаагийн цугларалтаа анх удаа хөдөө хийж байгаа аж.
Хүүхдүүд энэ сарын 22-27-ны өдрүүдэд Толбо нуурын эрэг дээр тухалж, казах, тува, урианхай, дөрвөд угсаатны урлаг соёл, хоол, хувцас, аж ахуй зэрэг олон соёлтой танилцана. Скаутууд бие даан амьдрах ур чадварт суралцан, майханд амьдарч, хоолоо хээрийн нөхцөлд хийж, салааны зохион байгуулалтад орж, хөгжлийн хөтөлбөрүүдэд хамрагдаж, шинэ танилтай болно.
Үндэсний VII жемборигийн нээлт өнөө орой болно. Түүнд УИХ-ын гишүүд, тус аймгийн удирдлагууд оролцох юм.
