Болгар улсын нутагт орших Бачо Киро агуйгаас олдсон ясны үлдэгдэл, эд зүйлс орчин үеийн хүний өвөг дээдэс өмнө нь тооцоолж байснаас эрт Европ тивд хүрснийг харуулжээ.
Тодруулбал Хомо сапиенсууд 45,000 орчим жилийн өмнө Европт байсан бөгөөд Неандерталиудтай нэлээд хэдэн мянган жил зэрэгцэн амьдарсан гэж дүгнэсэн байна.
Агуйгаас олдсон яснууд нь Неандерталь хүнийх биш, орчин үеийн хүний өвөг дээдсийнх болохыг генетикийн шинжилгээгээр тогтоожээ.
Мөн агуйд хадгалагдаж байсан чулуун болон ясан зэвсэг, эдлэлүүд нь Хомо сапиенсуудын бүтээл болохыг тогтоосон байна.
Европт ирсэн хугацаа нь Моравиас эхлээд Монгол хүртэл газар нутагт Хомосапиенсуудын нүүдэллэж очсон хугацаатай таарч байгааг Германы Макс Планкийн нэрэмжит Антропологийн Хүрээлэнгийн хүний эволюцийн тэнхимийн захирал Жан Жак Хаблин тайлбарлажээ.
Түүний үзэж байгаагаар бол Неандерталиуд бүрэн устаж алга болох хүртэл найман мянга орчим жилийн турш хүний хоёр өөр төрөл зүйл зэрэгцэн амьдарч байсан гэнэ.
“Бидний өвөг дээдэстэй өрсөлдөж ялагдсаны улмаас Неандерталиуд Европ тивээс устаж алга болсон гэдэгт би итгэдэг. Гэхдээ энэ үйл явдал ганцхан шөнийн дотор болоогүй нь ойлгомжтой” гэж Хаблин ярьж байна.
Түүний ахалсан судалгааны тайлан өчигдөр буюу Даваа гарагт “Nature” сэтгүүлд нийтлэгдсэн юм.
Хүний хоёр өөр төрөл зүйл хоорондоо эвцэлдэн үржиж байсныг орчин үеийн хүмүүсийн генийн мэдээлэл баталдаг. Үүнээс гадна тэд соёлын солилцоо явуулж, харилцан мэдлэг технологио хуваалцаж байсныг Болгарын агуйгаас олдсон чулуун болон ясан багаж зэвсэг, эдлэлүүд баталж байгаа гэнэ.
Яг ийм эд зүйлс баруун Европ дахь Неандерталиудын амьдарч байсан агуйгаас өмнө нь олдож байжээ.
Эх сурвалж: Reuters
Р.ТӨМӨР, IKON.MN
