ТОКИО. /RIA Novosti/. БНАСАУ онцгой нөхцөл байдал үүссэн тохиолдолд тус улсын удирдагч Ким Жөн Уны оронд түүний эмэгтэй дүү Ким Ё Жоныг томилох бэлтгэлийг өнгөрсөн оны сүүлчээс хойш хангаж эхэлсэн гэж Японы "Иомиури" сонин Өмнөд Солонгосын болон Америкийн эх сурвалжуудын мэдээллээс иш татан мэдээлжээ.
Эх сурвалжуудын мэдээлж байгаагаар, 2019 оны сүүлчээр болсон Солонгосын Хөдөлмөрийн намын Төв хорооны хурлын үеэр Ким Жөн Уныг гэнэт нас барсан тохиолдолд түүний бүх эрх мэдлийг эмэгтэй дүү Ким Ё Жонд шилжүүлэн өгөх шийдвэрийг гаргажээ. "Иомиури" сонины эх сурвалжуудын батлан хэлж буйгаар, үүний дараа “Ким Ё Жоны нэрээр намын болон цэргийн шугамаар олон удирдамж өгсөн байна”.
Цусны даралт ихсэх, зүрхний өвчин, чихрийн шижнээр өвчилсөн Ким Жөн Уны биеийн байдал муудсаны улмаас Францын хэсэг эмч нар Пёньянд нэгдүгээр сард очсон гэж эх сурвалжууд хэлсэн байна. Түүний оронд дүүг нь томилох ажлыг түргэвчилж эхэлсэн бөгөөд Ким Ё Жон одоо Умард Солонгосын шатлан захирах тогтолцооны “хоёр дахь хүн” болжээ.
Ким Жөн Ун сүүлийн өдрүүдэд “сураггүй алга болсон” бөгөөд энэ нь түүний эрүүл мэндийн асуудалтай холбоотой байж магадгүй гэж хэвлэлүүд өмнө нь мэдээлсэн. Гэвч Умард Солонгосын удирдагчийн биеийн байдал тааруу байгаа гэх мэдээлэл батлагдаагүй гэж өмнө нь Ким Жөн Унтай гурван ч удаа уулзсан АНУ-ын Ерөнхийлөгч Дональд Трамп мэдэгдсэн юм.
