Монгол Улс 2025 онд дэлхийн хамгийн нэр хүндтэй мал аж ахуйн тэмцээн болох “Алтан хайч” (Golden Shears) олон улсын тэмцээнийг анх удаа зохион байгуулахаар болсон билээ. Тэгвэл уг тэмцээн зургаадугаар сарын 20, 21-ний өдрүүдэд зохион байгуулагдана.
Төв аймгийн Зуунмод хотод ноос хяргах, ангилах, багцлах зэрэг төрлөөр явагдах тус тэмцээнд оролцогчид чөлөөт, мэргэжлийн, залуус, анхлан суралцагч, ахисан шатны гэсэн таван ангиллаар өрсөлдөнө.
Энэ тэмцээнийг манай улсад анх удаа Ерөнхийлөгч У.Хүрэлсүхийн ивээл дор зохион байгуулж, төрөл тус бүрийн ялагчдад Ерөнхийлөгчийн нэрэмжит цом олгох гэж байгаа юм. Мөн цахилгаан хайчны мэргэшсэн түвшний ялагч 2026 оны дэлхийн аварга шалгаруулах тэмцээнд оролцох эрх авах юм.
Манай улсын хувьд энэ салбарт 2022 оноос эхлэн олон улсын мэргэшсэн 28 ноос хяргагч бэлтгэн гаргаад байгаа юм.
Тэмцээний үеэр ноос, ноолууран бүтээгдэхүүний үзэсгэлэн худалдаа, загварын шоу, шагайн харваа, сурын харваа, ноос томнох, дууны уралдаан болно.
