Сэргээгдэх эрчим хүчний эх үүсвэрээс үйлдвэрлэсэн эрчим хүчийг түгээх сүлжээнд нийлүүлэхтэй холбоотой журмын хэрэгжилтийг хангах, үнэ тарифыг нь шинэчлэх, энэ чиглэлээр цаашид авах арга хэмжээг тодорхойлох зорилготой олон нийтийн хэлэлцүүлгийг Эрчим хүчний реформын үндэсний хорооноос өнгөрсөн сард зохион байгуулсан билээ. Тэгвэл эл хэлэлцүүлэгт үндэслэн гаргасан зөвлөмж, саналд тулгуурлан Эрчим хүчний зохицуулах хорооноос хэрэглэгчийн сэргээгдэх эрчим хүчний эх үүсвэрээс түгээх сүлжээнд нийлүүлсэн нэг кВт цахилгаан эрчим хүчний өдрийн тарифыг 285, оргил цагийн үеийнхийг нь 300 төгрөгөөр тооцохоор баталсан байна. Үүнээс өмнө 06.00-17.00 цагт нийлүүлснийг нь өдрийн тарифаар буюу 140 төгрөгөөр, оргил ачааллын 17.00-21.00 цагт нийлүүлснийг нь 221 төгрөгөөр тооцдог байж. Өдрийн тарифыг хоёр дахин, оргил ачааллын үеийнхийг нь 79 төгрөгөөр нэмжээ.
Засгийн газар 2024-2028 оны үйл ажиллагааны хөтөлбөртөө сэргээгдэх эрчим хүчний тархмал эх үүсвэрийг дэмжих ажлуудыг хэрэгжүүлэхээр тусгасан. Үүний нэг нь тарифын шинэчлэл гэдгийг Эрчим хүчний реформын үндэсний хорооныхон онцлов. Ингэснээр хэрэглэгч өөрийн эх үүсвэрээс үйлдвэрлэсэн илүүдэл эрчим хүчээ түгээх сүлжээнд нийлүүлж, өгөөж хүртэх боломж нэмэгджээ. Түүнчлэн Эрчим хүчний яамнаас сэргээгдэх эрчим хүчний эх үүсгүүрээс үйлдвэрлэсэн эрчим хүчийг түгээх сүлжээнд нийлүүлэхтэй холбоотой журмыг шинэчлэн сайжруулахаар ажиллаж байгаагаа мэдээлэв.
