Олон оронд цахим спорт эрчимтэй хөгжиж, сонирхон хичээллэгсэд жилээс жилд нэмэгдэх болсон. ОУОХ-ноос цахим спортыг олимпын хөдөлгөөний нэг хэсэг болгох санаачилга гаргаж, 2023 онд “Олимпын цахим спортын долоо хоног”-ийг Сингапурт өрнүүлсэн билээ. Тэгвэл Саудын Араб улсад цахим спортын олимпын наадмыг энэ онд зохион байгуулахаар болсноо зарлав. Манай улсын тамирчид тив, дэлхийн тэмцээнд амжилт үзүүлж байгаа тул МҮОХ-ны дэргэд Цахим спортын комисс байгуулж, анхны хуралдаанаа хийв. Цахим спортын комисс нь ОУОХ, Азийн олимпын зөвлөлийн цахим спортын комисстой үйл ажиллагааны төлөвлөгөө, стратеги боловсруулах чиглэлээр хамтран ажиллахаар төлөвлөжээ.
Сонирхуулахад, өмнөд хөршийн Ханжоу хотод 2023 онд болсон Азийн наадамд цахим спортыг тэмцээний албан ёсны төрөлд багтаж, “Дота 2” тоглоомын төрлөөс Монголын шигшээ баг мөнгөн медаль хүртсэн билээ.
