Хот наадмын өмнөхөн үерт автсан. Ихээхэн хохирол учирсан. Хэрэг явдал яагаад ийм дээрээ тулсныг төр, хуулийнхан орхиогүй бололтой. Ерөнхий сайд "...Газар олголт, барилгын зөвшөөрөлтэй холбоотойгоор үерийн сувгийг халхалснаас эрсдэл үүссэн байж болзошгүй" асуудлаар АТГ, УЕПГ-т хандсан талаар хэвлэлүүд мэдээлжээ. Буруутай "объект"-ууд нь бараг тодорхой л доо. "Авлигал хороолол" гэх мэт хэд хэдэн барилга бий.
Юутай ч АТГ, ЭЦА-наас энэ асуудлаар томоохон хэмжээний мөрдөн шалгах ажиллагааг явуулж эхэлсэн байна.
Мөн Ерөнхий сайдын хүсэлтийн дагуу Ерөнхий прокурор үерийн хохирлыг нэхэмжилж шүүхэд хандах бололтой.
Учир нь Прокурорын тухай хуульд зааснаар, прокурор нь нийтийн ашиг сонирхол зөрчигдсөн гэж үзвэл төрийн байгууллагын хүсэлт, эсхүл өөрийн санаачилгаар Захиргааны болон Иргэний хэрэг шүүхээр хянан шийдвэрлэх ажиллагаанд зохигчоор, эсхүл гуравдагч этгээдээр оролцох, мөн нэхэмжлэл гаргаж болдог. Өөрөөр хэлбэл, Эрүүгийн хэрэг хянан шийдвэрлэх тухай хуулийн 34.7.8, Прокурорын байгууллагын тухай хуулийн 20.1, 20.4, Иргэний хуулийн 62 дугаар зүйлийн 62.3-т зааснаар олгогдсон. Энэ эрх нь прокурорын дээд байгууллага буюу УЕПГ-т хадгалагддаг тул Ерөнхий прокурор шүүхэд хандах юм байна.
Эх сурвалж: “Зууны мэдээ” сонин
