Монгол Улсын Засгийн газраас хэрэгжүүлж буй “Шинэ сэргэлтийн бодлого”-ын Хот, хөдөөгийн сэргэлтийн хүрээнд Ховд аймагт 2023 оны 1-р сарын 19-22-ны өдрүүдэд “Invest Khovd” хөрөнгө оруулалтын форум, “Мөнгөлөг шагшуурга” арга хэмжээ болно.
Тус арга хэмжээний талаар Ховд аймгийн Засаг дарга Э.Болормаа мэдээлэл өглөө.
“Invest Khovd” хөрөнгө оруулагчдын чуулга уулзалт нь 2023 оны 1-р сарын 19-20-ны өдрүүдэд Ховд хотод болно. Хөрөнгө оруулалтын чуулган нь “Шинэ сэргэлтийн бодлого” болон Улаанбаатар хотоос орон нутагт шилжин суурьших иргэд, аж ахуйн нэгж байгууллагыг дэмжих тухай Засгийн газрын тогтоолын хэрэгжилтийг хангах ажлын хүрээнд болж байна.
Энэ хүрээнд Ховд аймагт хөрөнгө оруулалт, чадварлаг боловсон хүчнийг татах, тус аймагт буй хөрөнгө оруулалтын таатай орчин, нөөц боломжийг танилцуулах, Ховд аймгийн болон баруун бүсийн бизнес эрхлэгчид, хөрөнгө оруулагчид, санхүүжүүлэгчдийн уулзах тавцанг бий болгож хөгжлийн гарц, шийдлүүдийг хөдөлгөөнд оруулах зорилгоор хөрөнгө оруулалтын чуулганыг зохион байгуулна.
Чуулга уулзалтын үеэр “Хөрөнгө оруулалт Ховд” форум, залуучуудад зориулсан “Unplug – Шинэ үеийн манлайлагчдын цугларалт” арга хэмжээ, хөрөнгө оруулалт, бизнесийг дэмжих байгууллагуудын нэг цэгийн үйлчилгээний бизнес төвийн нээлт, нийслэл болон Ховд аймгийн бизнес эрхлэгчдийн үзэсгэлэн худалдаа, олон улсын төсөл хөтөлбөрүүдийг танилцуулах уулзалт болно.
Мөн өвлийн аялал жуулчлалд тулгуурласан “Мөнгөлөг шагшуурга” арга хэмжээ 2023 оны 1 сарын 21-22-ны өдрүүдэд Хар ус нуурын байгалийн цогцолбор газарт болно. Монгол Улсын Засгийн газраас 2023-2025 оныг Монголд зочлох жил болгон зарласантай холбогдуулан “МӨНГӨЛӨГ ШАГШУУРГА-2023” цас мөсний баяр наадмыг Баруун Монголын угсаатны онцлогийг хадгалсан аялал жуулчлалыг хөгжүүлэх, байгаль дэлхий, үндэсний өв соёлоороо бахархах, өвлийн аялал жуулчлал, нийтийн биеийн тамирыг хөгжүүлэх зорилгоор зохион байгуулж байна.
Арга хэмжээний хүрээнд угсаатнуудын баярын жагсаал, Монгол туургатны “Мөсөн сур”-ын харваа, Монгол шагайн наадгай, Мөсний барилдаан, “Ice drift” уралдаан, бүргэдийн үзүүлбэр, “Тэмээчин” тэмцээн, “Адуучин” тэмцээн, “Алтайгаа магтъя” язгуур урлагийн тоглолт, “Олон угсаатны өвлийн гоёл” наадам, морин чарга, чарга тэшүүрийн үйлчилгээ, морь, тэмээ унуулах үйлчилгээ, хоол ундны худалдааны үйлчилгээ зэрэг тэмцээн уралдааныг зохион байгуулна.
Уг арга хэмжээний гол онцлог нь бүс нутгийн эдийн засгийн хөгжил, хүн амын амьдралын чанарыг сайжруулахад Ховд аймгийн суурь нөхцөл, боломжтой танилцах боломжтой бөгөөд бизнес эрхлэгчид хамтран ажиллах боломжийг танилцуулж, хамтын шийдэлд хүрэх зорилготой юм.
Дэлгэрэнгүй мэдээллийг Ховд аймгийн Засаг даргын Тамгын газрын цахим хаягуудаар авах боломжтой.
