Эдийн засаг - Nutag.mn

Төрийн үйлчилгээний салбарын ажилчдын цалинг 50 хувиар нэмнэ

zulaa — Thu, 22 Oct 2026 10:26:23 +0800

Төсвийн тодотголоор төрийн үйлчилгээний зарим салбарын ажилтнуудын цалинг тодорхой хувиар нэмэгдүүлэхээр боллоо. Өөрөөр хэлбэл, салбар хоорондын цалингийн зөрүүг арилгаж, арваннэгдүгээр сарын 1-нээс цалингийн өсөлтийг 50 хувьд хүргэнэ. Үүнд эрүүл мэндийн салбарын ажилтан, албан хаагчдын цалинг 20 хувь, соёл, спорт, цаг уур зэрэг төрийн үйлчилгээний бусад салбарын ажилчдын цалинг 50 хувиар нэмэгдүүлэхээр болов.

Мөн Хөгжлийн бэрхшээлтэй иргэдийн нийгмийн хамгааллын тэтгэвэр арваннэгдүгээр сарын 1-нээс одоо 26 хувиар нэмэгдэнэ.

Тодруулбал, сард 600 мянган төгрөг болно. Асаргааны тэтгэмжийг 12 хувиар нэмэгдүүлж 370 мянган төгрөг болгожээ. Эдгээр нэмэгдэлд давхардсан тоогоор 170 гаруй мянган иргэн хамрагдана.

ТАНИЛЦ: 1.4 их наядыг хаанаас хэмнэж төсвийн тодотголыг хийв

zulaa — Mon, 19 Oct 2026 12:45:41 +0800

Засгийн газар 2026 оны улсын төсвийн тодотголыг 2026 оны наймдугаар сарын 20-нд УИХ-д өргөн барьсан. Тэгвэл тус хуулийн төслийг УИХ өнгөрсөн баасан эцэслэн баталлаа.

Төсвийн тодотголыг баталснаар арваннэгдүгээр сарын 1-ээс эмч, багш нарын цалинг олгох боломжтой болсноос гадна тэтгэвэр 100-300 мянган төгрөг нэмэгдэхээр болов.

1.4 их наядыг хаанаас хэмнэж төсвийн тодотголыг хийсэнтэй танилц

Засгийн газраас 2026 оны төсвийг 1.4 их наядаар танаж 1.4 их наядыг цалин, тэтгэвэр, стратегийн бүтээгдэхүүний нөөц бүдүүлэх, эрчим хүчний татаасанд зарцуулахаар тусгасан ирсэн.

1.4 их наядыг хаанаас хэмнэсэн бэ? гэсэн асуултад Сангийн яамнаас нийслэлийн үнэт цаас 758 тэрбум төгрөг, урсгал зардлаас (Сайд нарын багц): 433.4 тэрбум төгрөг, хөрөнгийн зардлаас 249.5 тэрбум төгрөг хэмнэсэн гэлээ. Харин Засгийн газрын өргөн мэдүүлсэн төсөлд гэрт ойрхон сургууль байгуулахад 50 тэрбум төгрөг төсөвлөсөн ч хэлэлцүүлгийн шатанд хасагджээ.

Боловсролын сайд Л.Энх-Амгалан “УИХ-ын гишүүн С.Цэнгүүн, Б.Жаргалан нарын гаргасан саналын томъёоллоор дэмжигдээд түрээсэлж байгаа сургууль цэцэрлэгүүдийн 30 мянган хүүхэд 10, 11, 12 сарын түрээсийн зардалгүй үлдэж байна” хэмээн мэдэгдсэн байдаг.

ҮНЭ ХАНШ: Хязаалан гунан үхрийн үнэ 2 сая 900 мянган төгрөгт хүрчээ

zulaa — Wed, 14 Oct 2026 16:35:21 +0800

Хэрэглээний бараа, үйлчилгээний үнэ 2026 оны 9 дүгээр сард улсын хэмжээнд өмнөх оны мөн үеэс 12.9 хувиар, өмнөх сараас 0.6 хувиар тус тус өссөн хэмээн ҮСХ-ноос мэдээллээ.

Инфляцын түвшин 2025 оны есдүгээр сард 9 хувь байсан бол 2026 оны эн сард 12.9 хувь болж, өсөлтийн хурдац өмнөх оны мөн үеэс 3.9 нэгж хувиар өссөн байна. Улсын инфляцад бензин, түлшнээс бусад импортын барааны үнэ 2.0 нэгж хувиар (15.9%), мах, хатуу түлшнээс бусад дотоодын барааны үнэ 4.4 нэгж хувиар (34.3%) тус тус нөлөөлжээ.

Малын зах зээлийн 2026 оны есдүгээр сарын дундаж үнийн мэдээг хүргэе. Өнгөрсөн сарын байдлаар атны үнэ 2.4 сая төгрөг болж, 2025 оны мөн үеэс 900 мянган төгрөгөөр, соёолон үрээний үнэ 1.8 сая төгрөг болж 500 мянган төгрөгөөр өсжээ. Тэгвэл хязаалан гунан үхрийн үнэ 2.9 сая төгрөг болж, өмнөх оны мөн үеэс 1.5 сая төгрөгөөр, эр хонины үнэ 490 мянган төгрөг болж 210 мянган төгрөгөөр, эр ямааны үнэ 320 мянган төгрөг болж 140 мянган төгрөгөөр тус тус өсжээ.

Улаанбаатар хотод худалдаалагдаж буй үхрийн цул 1 килограмм махны дундаж үнэ 2026 оны 9 дүгээр сард 35023 төгрөг болж, 2024 оны 9 дүгээр сараас 70.0 хувиар, 2025 оны 9 дүгээр сараас 43.7 хувиар тус тус өсөж, өмнөх сараас 4.1 хувиар (1498 төгрөгөөр) буурсан байна. 1-р зэргийн гурилын дундаж үнэ 2026 оны 9 дүгээр сард 2538 төгрөг болж, 2024 оны 9 дүгээр сараас 7.4 хувиар, 2025 оны 9 дүгээр сараас 3.6 хувиар, өмнөх сараас 0.6 хувиар (16 төгрөгөөр) тус тус өссөн үзүүлэлттэй гарчээ.

ОХУ-аас импортлох нефтийн бүтээгдэхүүний үнэ нэмэгджээ

zulaa — Tue, 13 Oct 2026 12:10:32 +0800

АИ-92 автобензины үнэ нэмэгдсэн гэх мэдээлэл цахим орчинд гарсан. Албаныхны өгсөн мэдээллээр аравдугаар сард ОХУ-аас импортлох нефтийн бүтээгдэхүүний үнэ нэмэгдсэн байна. Үүнтэй холбоотойгоор аж ахуйн нэгжүүд өнгөрсөн өдрүүдэд шатахууныг өртгөөс нь доогуур үнээр худалдаалж байжээ.

Олон улсад үүссэн хямралт нөхцөл байдал үргэлжилж байгаагаас нефтийн бүтээгдэхүүний бүх төрлийн үнэ өөрчлөгдсөөр байгааг Аж үйлдвэр, эрдэс баялгийн яамнаас мэдээллээ.

Тус яам өнөөдөр энэ асуудлаар мэдээлэл хийх бөгөөд гарсан шийдвэрийг бид эргэн мэдээлэх болно.

Инфляц 12.9 хувьд хүрч, махны үнэ 46.9 хувиар өсчээ

zulaa — Mon, 12 Oct 2026 09:31:36 +0800

Монгол Улсын инфляц энэ оны есдүгээр сард 12.9 хувьд хүрч, өнгөрсөн оны мөн үеийнхээс 3.9 нэгж хувиар өсчээ. Өнгөрсөн оны есдүгээр сард инфляц 9 хувьтай байсан бол энэ жил ийнхүү 12.9 хувь болсон байна.

Инфляцыг хамгийн их хөөргөсөн зүйл нь хүнсний үнэ аж. Тодруулбал, нийт инфляцын 43.8 хувь буюу 5.6 нэгж хувийг хүнсний бараа, ундаа, усны үнийн өсөлт бүрдүүлжээ. Үүний дараа тээврийн үнэ 2.2 нэгж хувь буюу 17.3 хувь, боловсролын үйлчилгээ 1.2 нэгж хувь буюу 9.1 хувь, хувцас, бөс бараа, гутлын үнэ 0.9 нэгж хувь буюу 7.2 хувийг бүрдүүлсэн байна.

Ялангуяа махны үнэ нэлээд огцом өсчээ. Энэ оны есдүгээр сард мах, махан бүтээгдэхүүний үнэ өмнөх оны мөн үеэс 46.9 хувиар өссөн бөгөөд үхрийн мах 48.4 хувь, хонь, ямааны мах 58.5 хувиар нэмэгдсэн байна.

Талх, гурил, будааны үнэ ч мөн өсөж, өмнөх оны мөн үеэс 9.6 хувиар нэмэгджээ. Үүнд гурил болон түүнтэй төстэй бүтээгдэхүүний үнэ 11.1 хувь, гоймонгийн үнэ 28.2 хувиар өссөн нь нөлөөлсөн байна.

Харин импортын бараа ч инфляцын бас нэг том дарамт болжээ. Нийт инфляцын 4.1 нэгж хувь буюу 32.1 хувь нь импортын барааны үнийн өсөлтөөс шалтгаалсан байна. Манай хэрэглээний сагсанд багтдаг 430 нэр төрлийн бараа, үйлчилгээний 238 нь импортын бараа бөгөөд нийт сагсны 55.3 хувийг эзэлж байгаа аж.

Улаанбаатарын хувьд инфляц улсын дунджаас бага буюу 11.9 хувь гарсан байна. Нийслэлд өнгөрсөн оны мөн үеэс мах, хатуу түлшнээс бусад дотоодын барааны үнэ 4.7 нэгж хувь, бензин, түлшнээс бусад импортын барааны үнэ 1.4 нэгж хувиар тус тус нөлөөлжээ.

Тэгвэл нийслэлийн дэлгүүрүүдэд худалдаалагдаж буй үхрийн цул махны үнэ нэг кг нь дунджаар 35,023 төгрөг болсон байна. Энэ нь өнгөрсөн оны мөн үеэс 43.7 хувиар өссөн үзүүлэлт. Харин өмнөх сараас 1,498 төгрөгөөр буурчээ.

Мөн нэгдүгээр зэргийн гурилын үнэ дунджаар 2,538 төгрөг, АИ-92 бензиний үнэ литр нь 3,040 төгрөг болсон байна. АИ-92 бензиний үнэ өнгөрсөн оны мөн үеэс 17.4 хувиар өсчээ.

Инфляц зөвхөн нийслэлд өндөр байгаа биш, бүх аймагт 10.5-18.5 хувийн өсөлттэй гарсан байна. Хамгийн бага нь Сүхбаатар аймагт 10.5 хувь, хамгийн өндөр нь Увс аймагт 18.5 хувь байжээ.

Товчхондоо, 12.9 хувийн инфляцын цаана мах, хүнс, тээвэр, боловсрол болон импортын барааны үнийн өсөлт голлон нөлөөлсөн байна.

Нийслэлд махны үнэ буурсан бол орон нутагт үхрийн махны үнэ ялимгүй өсөв

zulaa — Wed, 07 Oct 2026 09:29:47 +0800

Үндэсний статистикийн газраас танилцуулсан 2026 оны аравдугаар сарын 5-ны өдрийн байдлаар Улаанбаатар хот болон орон нутагт зарим гол нэрийн бараа, бүтээгдэхүүний долоо хоногийн дундаж үнэ өмнөх сарын 28-ны өдөртэй харьцуулахад хэлбэлзэлтэй байна. Бараа бүтээгдэхүүний дундаж үнэ өмнөх долоо хоногоос 0.1 хувиар өссөн үзүүлэлттэй байгаа хэдий ч өмнөх сарын дундажтай харьцуулахад 0.3 хувиар буурсан дүнтэй гарчээ.

Улаанбаатар хотын зах зээлд махны үнэ өмнөх долоо хоногоос буурсан эерэг өөрчлөлт ажиглагдаж байна. Тодруулбал, ястай хонины болон ястай үхрийн махны үнэ тус бүр 1.0 хувиар хямдарч, ястай хонины мах 25,674 төгрөг, ястай үхрийн мах 30,804 төгрөгт хүрчээ.

Харин үхрийн цул махны үнэ тогтвортой буюу 34,737 төгрөгийн ханштай байна. Сүү, өргөн хэрэглээний зарим барааны хувьд өсөлттэй гарлаа. "Миний Монгол" сүүний үнэ хамгийн өндөр буюу 5.6 хувиар өсөж 5,344 төгрөгт хүрсэн бол дотоодын төмс 1.1 хувиар өсөж 1,989 төгрөг, өндөгний үнэ 0.3 хувиар өсөж нэг ширхэг нь 620 төгрөг болоод байна.

Аймгийн төвүүдэд, орон нутгийн хэмжээнд хонины мах 0.4 хувиар 21,373 төгрөг, ямааны мах 0.8 хувиар 19,085 төгрөгөөр тус тус буурсан бол үхрийн мах 0.3 хувиар 25,465 төгрөг бага зэрэг өсжээ. Мөн задгай сүү 1.2 хувиар өсөж 4,182 төгрөг, 1-р зэргийн гурил 0.2 хувиар өсөж 3,311 төгрөгт хүрсэн бөгөөд цагаан будаа болон элсэн чихрийн үнэ 0.02 хувиар бага зэрэг нэмэгдсэн байна.

Махны үнэ буурах ч лөөлөө боллоо

zulaa — Wed, 17 Jun 2026 10:18:13 +0800

Хаврын цагт нийслэлчүүд ийм үнэтэй мах идэж байсан нь тун ховор билээ. Угтаа бол Хүнс, хөдөө аж ахуй, хөнгөн үйлдвэрийн сайд Ц.Идэрбат махны үнэ зургадугаар сарын 15-аас буурна гэж ам өгчихсөн. Гэвч өнөөдөр махны үнэ буурсангүй харин ч эсэргээрээ 40 мянга давчихав.

Статистикийн мэдээллээс харахад махны үнэ тийм өндөр биш байгаа ч бодит байдал дээр зах, худалдааны төвүүдэд 35 мянгаас дээшилж, одоо бүр орон нутагт нь ч нэмэгджээ.

Өнгөрсөн амралтын өдрүүдэд махны үнэ лав буурсангүй. Учир нь баруун аймгуудад шүлхий өвчин гарч, бүр Сэлэнгэ аймаг руу хүртэл шилжсэн учраас махны үнэ буураагүй, цаашид ч буурах эсэх нь тодорхойгүй гэдгийг мах худалдаачид хэлж байлаа.

Дан ганц мах гэлтгүй өргөн хэрэглээний барааны үнэ өдрөөс өдөрт өсч байгааг манай дарга нар анзаарч байгаа ч юм алга.

Үндэсний статистикийн хорооны мэдээлснээр 2026 оны зургадугаар сарын 8-ны өдрийн байдлаар хонины ястай мах нэг килограмм нь дунджаар 27763 төгрөг, үхрийн ястай мах нэг килограмм нь дунджаар 33883 төгрөгийн үнэтэй тус тус худалдаалагдаж байна. Энэ нь өнгөрсөн долоо хоногтойгоо харьцуулахад 0.4 хувийн өсөлттэй гарсан гэж мэдээлж. Харин энэ долоо хоногт энэ тоо бүүр ч нэмэгдэж, баруун аймгуудад гарсан шүлхий өвчнөөс шалтгаалж, хөдөөнөөс ирэх махны тоо буурч, ийнхүү өсөхөд хүрсэн гэдгийг худалдаачид хэлж байна.

Баян-Өлгий, Ховд аймгийн хэмжээнд гарсан "САТ-1" хэвшлийн шүлхий өвчний тохиолдлууд бүртгэгдээд багагүй хугацаа өнгөрсөн ч өнөөдрийг хүртэл вакцины асуудал толгойны өвчин хэвээр байна. Ийн шүлхий гарснаас баруун аймгуудад шүлхийтэй малыг усгалд оруулж, зарим аймагт олон нийтийн арга хэмжээ зохион байгуулахыг ч хориглоод эхэлсэн. Анх Баян-Өлгий, Ховд аймагт бүртгэгдсэн бол өнөөдөр Өвөрхангай, Төв, Сэлэнгэ гээд илүү өргөн хүрээг хамрахаар байгаа учраас вакцины асуудлыг яаравчлахгүй бол махны үнэ буурах нь ч ёстой лөөлөө болохоор байна.

ХХААХҮ-ийн сайд Ц.Идэрбат "Монгол Улсын хэмжээнд урьд нь О хэвшлийн шүлхий бүртгэгдэж байсан бол А хэвшлийн шүлхий 2000 оноос хойш гурван удаа гарч байсан. Гэтэл энэ оны тавдугаар сарын 22-ны өдрөөс Монгол Улсад гарч байгаагүй ‘САТ-1’ хэвшлийн шүлхий өвчин Баян-Өлгий аймгийн хил дагуу сумдуудад гарсан. Тодруулбал, Мал эмнэлгийн ерөнхий газраас өнгөрсөн сарын 25-нд төв лабораторийн хариу гарч ‘САТ-1’ хэвшлийн шүлхий гэдэг нь батлагдлаа. Мөн тавдугаар сарын 27-ны өдөр Ховд аймагт ‘САТ-1’ хэвшлийн шүлхий гарсан. Энэхүү шүлхий өвчний хэвшлүүд нь хилийн дагуу гарч байна.

Нөгөөтэйгүүр, БНХАУ-ын баруун хойд хэсэг, ОХУ-ын баруун урдуур гарч байна. ‘САТ-1’ хэвшилтэй тэмцэхэд хөл хорио, утгал болон вакцинжуулалт хийх шаардлага үүсээд байгаа. Энэхшүү хэвшлийн шүлхий өвчний вакцин дэлхий нийтэд тулгамдсан асуудал болсон. Тийм учраас Улсын онцгой комисс болон Засгийн газрын хуралдаанаар шийдвэр гаргуулж вакцин худалдан авах ажлыг зохион байгуулж байна. Хоёр улсад ‘САТ-1’ хэвшлийн шүлхий өвчний вакцин үйлдвэрлэгдэж байгаа. Тиймээс урт дарааллын улмаас хоёр сар гаруй хүлээх эрсдэлтэй нөхцөлд байна. Нөхцөл байдлыг цааш хүндрүүлэхгүйн тулд ОХУ-аас вакцин худалдан авах процессыг хурдлуулахын төлөө ажиллаж байна" гэсэн тайлбарыг өгчээ.

Тэгэхээр вакцин бэлэн байхгүй, шүлхий зэрэгт улсаараа бэлэн биш байсан учраас вакцинаа ч бэлдээгүй, ингээд сумаас аймаг, аймгаас аймаг руу дамжсаар монголчууд хямдхан мах идэх асуудал алсарч байна.

Угтаа бол махны үнийг бууруулахын тулд нөөцийн мах худалдаанд гаргах асуудал яригдаж, үүнээс болж экс Хотын дарга Х.Нямбаатар огцорч байсан нь тун саяхан. Х.Нямбаатар огцорсон учраас нийслэлчүүд хямд мах идэх нь ээ гэж баярлаж суусан чинь дээрээс нь шүлхий нэмэгдчихэв. Одоо шүлхий гарч, махны үнэ бүр их үнэд орсонд хэн нэгэнд хариуцлага ярих ёстой бол "Үнэ зургадугаар сарын 15-аас буурч эхэлнэ" гэж амлалт өгсөн Ц.Идэрбат сайддаа хариуцлага тооцох уу, Ерөнхий сайд аа!

Ерөөсөө эрсдэлд бэлэн биш, салбараа мэддэггүй хүмүүсийг сайдаар томилж, өргөн хэрэглээний барааныхаа үнийг ч мэдэхгүй хүмүүсээр салбар удирдуулдаг, аливаа салбарт мэргэжлийн бус улс төрийн томилгоо хийж ирсний гор л доо. Тиймээс цаашид монголчууд мах "магнаг" болж байгааг, өргөн хэрэглээний барааны үнэ өсч байгааг гайхахаас илүү ийм нөхцөл байдалд хүргэсэн хүмүүст нь хариуцлага ярьдаг, тооцдог шаардлагыг тавьж эхлэх цаг болжээ.

https://news.mn/r/2872326/

Эрүүл мэндийн сайд Э.Батшугар: Эрүүл мэндийн даатгалын сан өргүй болсон. Өнгөрсөн оны эцэст 198 тэрбумын өртэй байсан

zulaa — Wed, 10 Jun 2026 17:46:16 +0800

Улсын эмнэлгүүд Эрүүл Мэндийн Даатгалын Сангаас санхүүжилт авч байгаа учраас иргэдээс нэмэлт төлбөр авах ёсгүй гэдгийг Эрүүл мэндийн сайд Э.Батшугар мэдээллээ.

Тэрбээр энэ талаар “Миний хувьд энэ асуудалтай холбоотой бүх шийдвэрийг гаргасан. Өчигдөр надад иргэдээс гомдол ирсний дагуу нийслэлийн бүх эмнэлгийн удирдлагуудтай уулзсан. Засгийн газар шаардлагатай бүх шийдвэрээ гаргасан байхад түүнийг хэрэгжүүлэхгүй байх ёсгүй. Эрүүл мэндийн даатгалын сан одоогийн байдлаар өргүй болсон.

Өнгөрсөн оны төгсгөлд 198 тэрбум төгрөгийн өр төлбөртэй байсан. Энэ асуудал одоо шийдэгдсэн. Цаашид эмийн хүртээмжийг нэмэгдүүлэхээр ажиллаж байна. Нийт 700 орчим эмийг хөнгөлөлттэй олгодог" хэмээн ярилаа.

Ардын намын зодоонд ард түмэн "үрэгдэж" эхлэв!

zulaa — Tue, 19 May 2026 17:08:06 +0800

Ард түмэн Ардын намд итгэл үзүүлэхдээ, иргэдийнхээ орлогыг нэмэгдүүлж, том төслүүдээ хөдөлгөж, эдийн засгаа солонгоруулж, ажлын байр нэмэгдүүлж, хүний эрхийг хязгаарладаггүй, жижиг, дунд бизнесээ дэмжээд, ажил хийгээд өгөөч гэсэн. Харин Ардын нам яг эсрэгээр нь ажиллаж, иргэдийн орлого нэмэгдсэнгүй, үнэ өсч, өргөн хэрэглээний барааны үнэ нэмэгдэж, том төслүүдээ гацааж, эдийн засаг элгээрээ хэвтэхэд тун ойрхон болов.

Сонгуульд ялалт байгуулаад нэгхэн жилийн дараа Засгийн газар, УИХ-ын дарга аа огцруулаад, албан тушаал эрх мэдлийн төлөө алалдан тэмцэлдсээр өнөөдрийг хүрэв. Дээрээ суудлаа олохгүй бол доороо гүйдлээ олохгүй гэдэг шиг засаг төр солигдох болгонд дагаад төрийн бүх шатанд ажил гацдаг, нэг хэсэг нь албан тушаал авах гэж, нөгөө хэсэг нь албан тушаалаасаа мултрах гэж явсаар төрийн бүх шатанд гацаа үүсгэнэ. Парламентын ордноос эхэлсэн Ардын намын зодоон одоо Хот руу орчихлоо, цаашид аймаг, сум гээд төрийн бүх шатанд очих нь. Нэг үгээр Ардын намынхан ард түмнээ бодох завгүй эрх мэдлийн төлөө тэмцэлдэж, албан тушаалын наймаа хийж, зодолдсоор хоёр жилийг үдэв. Монгол ардын намын зодооны гор гарч, өнөөдөр инфляци хоёр оронтой тоонд шилжилж, мах магнаг болж, өргөн хэрэглээний барааны үнэ тэнгэрт хадав. 2024 оны сонгуулийн үр дүнд үнэмлэхүй олонх болж, төр барьж байгаа.

Ардын нам ердөө хоёрхон жилийн дотор гурван Ерөнхий сайд, гурван УИХ-ын дарга сольж, түүнийгээ дагаад төрийн бүх бүтцэд халаа, сэлгээ хийсээр өдийг хүрэв.

Бүрэн эрхийнх нь тал хувь явчихсан байхад Ардын нам ард түмний амьдралыг сайжруулсангүй, иргэдийнхээ орлогыг нэмэгдүүлэх нэг ч олигтой шийдвэр гаргасангүй, улсынхаа хөгжлийг урагшлуулах бүтээн байгуулалт, том төслүүд хөдөлгөн ажлаа гацааж, албан тушаалаа булаацалдаж дуусаагүй байна. Одоо Ардын намынхан Улаанбаатар гэх том айлаар тоглож эхэллээ. Ардын намынхан үнэмлэхүй олонх болохдоо нийслэлд ч мөн ялалт байгуулж, нийслэлийг удирдаж байгаа. 2024 оны сонгуулиар нийслэлд ялж, хотыг тэр чигтээ МАН удирдаж байгаа. Хоёр жилийн турш парламент, Засгийн газраар тоглож, ээлж дараалан нэгнийгээ унагаж, эрх мэдлээ булаацалдсан бол одоо нийслэл рүү орж, Хотын даргаа чөлөөлөх шийдвэр гаргав. Ингэснээр дахиад дараагийн Хотын дарга, шинэ хотын дарга нь халаа сэлгээ хийсээр 2028 онтой золгох нь.

Үндсэндээ Ардын нам бүрэн эрхийнхээ хугацаандаа амласан мөрийн хөтөлбөрөөсөө ухарч, албан тушаал, эрх мэдэл булаацалдсан дөрвөн жил өнгөрөх төлөвтэй.

Ард түмэн, шударга ёс гэсэн худал үгээр халхавчилсан харин эсрэгээрээ Ардын намынхан л сайхан амьдарч, хаана мөнгө байна тэнд Ардын намынхан алалцаж, хаана эрх мэдэл байна тэнд Ардын намынхан л тэмцэлдэж байгааг ард түмэн үзэж бас харж байгаа. Монголчууд, сонгогчид ухаантай болсон шүү, Ардын намынхаан.

https://news.mn/r/2867006/

Хөвсгөл, Архангай аймагт нэг килограмм ноолуур 208-212 мянган төгрөгийн үнэтэй байна

zulaa — Mon, 27 Apr 2026 16:19:02 +0800

Монголын ноос ноолуурын холбооноос орон нутгаас ноолуур худалдан авч буй өнөөдрийн ханшийн мэдээллийг зарлалаа. Уг ханшийн мэдээг харвал, Ноолуур килограмм тутам нь 195-212 мянган төгрөгийн үнэтэй байна. Тухайлбал, Хөвсгөл, Архангай аймагт нэг килограмм ноолуур 208-212 мянган төгрөгийн үнэтэй байгаа нь дээд ханш тогтоожээ.

Өнөөдрийн байдлаар нэг килограмм ноолуур:

Төв аймагт 201-208 мянган төгрөг,
Булган аймагт 202-209 мянган төгрөг,
Хөвсгөл аймагт 208-212 мянган төгрөг,
Завхан аймагт 198-207 мянган төгрөг,
Архангай аймагт 208-211 мянган төгрөг,
Баянхонгор аймагт 195-205 мянган төгрөгийн үнэтэй байна.