Онлох - Nutag.mn

Өмнөговьд замын төлбөр дутуу төвлөрүүлсэн зөрчил илрүүлж, 761 сая төгрөг нөхөн авчээ

zulaa — Sat, 24 Oct 2026 20:04:27 +0800

Авлигатай тэмцэх газарт “Өмнөговь аймгийн удирдах албан тушаалтнууд Цагаан хад–Гашуунсухайт чиглэлийн хилийн боомт хүртэлх 30.8 км авто замыг нэр бүхий компанид эзэмшүүлж, замын хураамжийн орлогоос ашиг хүртдэг” гэх агуулгатай гомдол иржээ.

Шалгалтаар Өмнөговь аймгийн Засаг даргын 2024 оны А/350 дугаар захирамжаар уг авто зам болон түүний зурвас газрыг нэр бүхий төрийн бус байгууллагад гурван жилийн хугацаагаар эзэмшүүлэх гэрээ байгуулсан. Гэвч зам эзэмшигч тал зам ашигласны төлбөрийн орлогын тодорхой хувийг орон нутгийн авто замын санд бүрэн төвлөрүүлдэгүй байсан нь тогтоогджээ. Түүнчлэн гэрээний үүргийн хэрэгжилтэд зохих хяналт тавиагүй зөрчил илэрсэн байна.

2024, 2025 онд уг замаар аж ахуйн нэгжүүд давхардсан тоогоор 95,840 удаа зорчсон. Үүнд ногдох 958.3 сая төгрөгөөс ердөө 438.2 сая төгрөгийг төвлөрүүлсэн аж. Иймд АТГ-аас гэрээний талууд ашиг сонирхлын зөрчилтэй, бусдад давуу байдал үүсгэсэн байж болзошгүй гэж үзжээ.

Үүнтэй холбогдуулан Авлигатай тэмцэх газрын Урьдчилан сэргийлэх, соён гэгээрүүлэх хэлтсээс гэрээний хэрэгжилтэд тавих хяналтыг сайжруулах, зам ашигласны төлбөрийг бүрэн төвлөрүүлэх, тээврийн хэрэгслийн бүртгэлийг орчин үеийн технологид тулгуурлан боловсронгуй болгох зөвлөмж хүргүүлжээ.

Зөвлөмжийн дагуу Өмнөговь аймгийн Засаг дарга төлөвлөгөөт бус хяналт шалгалт зохион байгуулж, дутуу төвлөрүүлсэн 103.04 сая төгрөг болон дутуу мэдээлсэн 65,815 рейст ногдох 658.15 сая төгрөг, нийт 761.19 сая төгрөгийг орон нутгийн авто замын санд төвлөрүүлсэн байна.

Эх сурвалж: АТГ

10 настай хоёр хүү Хэрлэн голын мөсөн дээр тоглож байхад мөс цөмөрчээ

zulaa — Thu, 22 Oct 2026 12:09:36 +0800

Хэнтий аймгийн Хэрлэн сумын Хийд багийн Хэрлэнгийн гүүр хэмээх газарт бага насны хоёр хүүхэд Хэрлэн голын мөсөн дээр тоглож байхад нь мөс цөмөрчээ. Хүүхдүүд голын салаа руу эсэн мэнд гарсан боловч эрэг рүү буцаад гарч чадахгүй байна гэсэн дуудлагыг 2026 оны 10-р сарын 21-ний 17:10 цагт Онцгой байдлын газарт өгсөн байна.

Дуудлагын дагуу тус аймгийн Онцгой байдлын газрын Эрэн хайх, аврах салбарын алба хаагчдыг очиход тус аймгийн Хэрлэн сумын 6 дугаар багийн оршин суугч Э /10 настай, эрэгтэй/, Э /10 настай, эрэгтэй/ нар Хэрлэн голын салаанд байсныг эсэн мэнд гаргаад ар гэрийнхэнд нь хүлээлгэн өгсөн гэж ОБЕГ-аас мэдээллээ.

Говьсүмбэр аймагт тэмбүүгийн өвчлөл хамгийн өндөр байна

zulaa — Tue, 20 Oct 2026 16:29:26 +0800

Бэлгийн замаар дамжих халдвар зөвхөн Монгол Улсад төдийгүй дэлхий дахинд нийгмийн эрүүл мэндийн тулгамдсан асуудлын нэг хэвээр байна. Монгол Улсад эдгээр халдвар бэлгийн идэвхтэй амьдралтай 19–34 насныхны дунд харьцангуй өндөр бүртгэгддэг бөгөөд залуучуудын мэдлэг, мэдээлэл дутмаг, бэлгэвчийн хэрэглээ тогтмол биш байгаа нь халдвар тархах эрсдэлийг нэмэгдүүлдэг байна.

Бэлгийн замаар 30 гаруй төрлийн халдвар дамждаг гэж үздэг. Монгол Улсад тэмбүү, заг хүйтэн, трихомониаз, ХДХВ зэрэг халдварууд зонхилон бүртгэгддэг. Халдварын эрсдэлийг мэддэг хэрнээ “зүгээр байлгүй дээ” гэж бодон хамгаалалтгүй бэлгийн хавьталд орох нь халдвар авах, цаашлаад бусдад дамжуулах шалтгаан болдог. Мөн гэр бүлтэй хүмүүсийн дунд ч халдвар бүртгэгдсээр байгаа нь урьдчилан сэргийлэлт хүн бүрд хамаатай асуудал болохыг харуулж байна.

2026 оны эхний 9 сарын байдлаар Монгол Улсын хэмжээнд бэлгийн замаар дамжих халдварын 6679 тохиолдол бүртгэгдсэн нь нийт халдварт өвчний 18.8 хувийг эзэлж байна. Энэ нь өмнөх оны мөн үеэс 889 тохиолдлоор буурсан үзүүлэлт юм.

Нийт тохиолдлын 44.6 хувийг тэмбүү, 33.7 хувийг заг хүйтэн, 21.3 хувийг трихомониаз, 0.4 хувийг ХДХВ/ДОХ эзэлж байна.

Өөрөөр хэлбэл, бүртгэгдсэн бэлгийн замаар дамжих халдварын бараг тал хувийг тэмбүүгийн тохиолдол бүрдүүлжээ.

Гэхдээ өмнөх оны мөн үетэй харьцуулахад тэмбүүгийн өвчлөл 256 тохиолдлоор буурсан байна. Харин 10000 хүн амд ногдох тэмбүүгийн өвчлөлийн үзүүлэлтээр Говьсүмбэр аймаг 17.1, Өмнөговь аймаг 15.7, Сүхбаатар аймаг 11.3, Дорноговь болон Дорнод аймаг тус бүр 9.2, Улаанбаатар хот 11.1 байгаа нь улсын дунджаас өндөр үзүүлэлт болж байна.

Бэлгийн замаар дамжих халдварын хамгийн аюултай талуудын нэг нь зарим тохиолдолд ямар ч тодорхой шинж тэмдэг илэрдэггүй явдал юм. Халдвар авсан хүн өөрийгөө эрүүл гэж бодон явсаар өвчнийг бусдад дамжуулах, эмчилгээ хийлгэхгүй удсанаар хүндрэл үүсэх эрсдэлтэй.

Харин шинж тэмдэг илэрсэн ч эмчид хандахгүй, дур мэдэн эм хэрэглэх нь асуудлыг улам хүндрүүлдэг байна.

Түүнчлэн нэг хүн нэгэн зэрэг хоёр болон түүнээс дээш халдвар авах боломжтой. Эдгээр халдварын шинж тэмдэг төстэй байж болох тул зөвхөн гаднах шинж тэмдгээр нь ялгаж, ямар эм хэрэглэхээ шийдэх боломжгүй. Бусдын зөвлөгөө, интернэт дэх мэдээлэлд үндэслэн антибиотик дур мэдэн хэрэглэх нь халдварыг бүрэн эмчлэхгүй байх, шинж тэмдгийг түр бүдгэрүүлэх, нянгийн антибиотикт тэсвэржилт үүсэх эрсдэлийг нэмэгдүүлдэг. Тиймээс бэлгийн замын халдварын сэжигтэй шинж тэмдэг илэрсэн эсэхээс үл хамааран эрсдэлтэй хавьталд орсон бол шинжилгээ өгч, шаардлагатай эмчилгээг мэргэжлийн эмчийн заавраар хийлгэх нь чухал юм.

ЖИРЭМСЭН ЭХЧҮҮД ШИНЖИЛГЭЭГЭЭ ХУГАЦААНД НЬ ӨГӨХ ХЭРЭГТЭЙ

Бэлгийн замаар дамжих халдвар жирэмсэн эхээс урагт дамжих эрсдэлтэй. Гэхдээ жирэмсний хяналтад эрт хамрагдаж, шаардлагатай шинжилгээг цаг тухайд нь өгч, халдвар илэрвэл тохирсон эмчилгээ хийлгэснээр энэ эрсдэлийг бууруулах боломжтой.

2024 оны эхний найман сарын байдлаар улсын хэмжээнд жирэмсний хяналтад шинээр 38,648 эмэгтэй хамрагджээ. Тэдгээрээс трихомониаз илрүүлэх шинжилгээнд 92.5 хувь, заг хүйтэн илрүүлэх шинжилгээнд 92.4 хувь, тэмбүү илрүүлэх шинжилгээнд 98.8 хувь, ХДХВ илрүүлэх шинжилгээнд 97.9 хувь нь хамрагдсан байна.

Эдгээр үзүүлэлт жирэмсний хяналтын хүрээнд халдвар илрүүлэх шинжилгээ чухал байр суурь эзэлж байгааг харуулж байна. Гэхдээ шинжилгээнд хамрагдсан байх нь дангаараа хангалтгүй бөгөөд халдвар илэрсэн тохиолдолд эмчилгээг бүрэн хийлгэх шаардлагатай.

БЗДХ-ЫН ЭМЧИЛГЭЭ ЗӨВХӨН НЭГ ХҮНЭЭР ХЯЗГААРЛАГДАХГҮЙ

Бэлгийн замаар дамжих халдвар илэрсэн тохиолдолд зөвхөн өөрөө эмчлүүлээд зогсохгүй бэлгийн хамтрагчаа мөн шинжилгээ, шаардлагатай эмчилгээнд хамруулах нь чухал. Эс бөгөөс нэг нь эмчлүүлсэн ч нөгөө нь халдвартай хэвээр үлдэж, дахин халдвар дамжуулах эрсдэлтэй.

Монгол Улсын 21 аймаг, Улаанбаатар хотын есөн дүүрэгт БЗДХ-ын тусламж, үйлчилгээ үзүүлэх кабинет ажиллаж байгаа бөгөөд иргэд мэргэжлийн эмчид хандан зөвлөгөө авах, шинжилгээ өгөх, шаардлагатай эмчилгээ хийлгэх боломжтой.

Бэлгийн замаар дамжих халдварын талаар ичиж, санаа зовсноос эмнэлэгт хандахгүй байх нь эрсдэлийг нэмэгдүүлдэг. Халдварын шинж тэмдэггүй байсан ч эрсдэлтэй хавьталд орсон бол шинжилгээ өгөх, бэлгэвч тогтмол хэрэглэх, халдвар илэрвэл хамтрагчтайгаа хамт эмчлүүлэх нь өөрийгөө болон бусдыг хамгаалах хамгийн чухал алхам юм.

https://news.mn/r/2893891/

"Шинэ Ховд" үйлдвэрлэл, технологийн паркийн бүтээн байгуулалтыг эрчимжүүлнэ

zulaa — Sun, 18 Oct 2026 15:11:31 +0800

Монгол Улсын Ерөнхий сайд Н.Учрал Ховд аймагт /2026.10.17/ ажиллах үеэрээ “Шинэ Ховд” үйлдвэрлэл, технологийн паркийн талбайд ажиллаж, тулгарч буй асуудлыг нь шуурхай шийдвэрлэхээ илэрхийллээ. Бүтээн байгуулалт нь 2027 онд дуусаж, 2200 хүн шинээр ажилтай болно.

Монгол Улсын урт болон дунд хугацааны бодлогод баруун бүсэд мал аж ахуйн гаралтай түүхий эдийн анхан шатны боловсруулалтын түвшинг сайжруулж, нэмүү өртөг шингэсэн бүтээгдэхүүний үнэ цэнийг нэмэгдүүлэх зорилгоор “Шинэ Ховд” үйлдвэрлэл, технологийн паркийг Ховд аймгийн Жаргалант суманд байгуулахаар төлөвлөсөн. Бүтээн байгуулалт нь 2022 онд эхэлсэн.

Автозам, цахилгаан, цэвэр, бохир усны шугам сүлжээ, цэвэрлэх байгууламж, мэдээлэл холбооны шугам сүлжээ, арьс ширний цэвэрлэх байгууламж, уурын дулааны станц зэрэг найман төрлийн дэд бүтцийн ажил 95 хувьтай үргэлжилж байна.

Эдгээр ажилд 60.1 тэрбум төгрөг зарцуулжээ. Засгийн газраас дэд бүтцийн хөрөнгө оруулалтыг нь бүрэн шийдвэрлэн ажиллаж байна.

Тус паркт 100 гаруй аж ахуйн нэгж үйлдвэр байгуулах хүсэлт ирүүлжээ. Цаашид паркаа өргөжүүлж, хүнд үйлдвэрлэлийн бүс болгохоор ажиллаж байгаа гэж тус паркийн төлөөлөл хэлж байв.

Цэвэр бохир усны холболтын ажилд болон үйлдвэрлэл, технологийн паркт үйлдвэр байгуулах аж ахуйн нэгжүүдэд хөнгөлөлттэй зээлийн дэмжлэг хэрэгтэй. Мөн бизнес инкубатор, технологи дамжуулах төв зайлшгүй шаардлагтайг байгааг “Шинэ Ховд” үйлдвэрлэл, технологийн паркийн гүйцэтгэх захирал С.Батсайхан танилцууллаа.

Хууль эрх зүйн болон санхүү, хөрөнгө оруулалтын дэмжлэг үзүүлж ажиллахаа Ерөнхий сайд Н.Учрал илэрхийлээд Засгийн газраас Үйлдвэрлэл, технологийн паркийн эрх зүйн байдлын тухай хуулийг сайжруулж, шинэчлэх ажлыг эхлүүлээд байгааг хэллээ.

Монгол Улсын Бүсчилсэн хөгжлийн үзэл баримтлалд тулгуурлан Баруун бүсийн тулгуур төв, хилийн хоёр боомттой зах зээл нэвтрэх боломж сайтай учраас Ховд аймагт тус паркийг байгуулж буй.

Засгийн газраас малын гаралтай түүхий эдийн бүрэн боловсруулалтын түвшинг үе шаттай ахиулж, эцсийн бүтээгдэхүүний үйлдвэрлэл, экспорт нэмэгдүүлэх, “Цагаан алт” хөдөлгөөний хүрээнд ноолуурын бүрэн боловсруулалтын түвшинг 20 хувиас 40 хувь, ноос боловсруулалтыг 25 хувиас 55 хувь, арьс, ширний гүн боловсрлуулалтын түвшинг 30 хувиас 50 хувь хүртэл нэмэгдүүлэхэд анхаарч хөрөнгө оруулалт, бодлогын дэмжлэг үзүүлэн ажиллаж байна.

Дархан цаазат газарт хайгуул хийхийг зөвшөөрсөн этгээдүүдэд ял оноов

zulaa — Wed, 14 Oct 2026 15:16:47 +0800

Говийн бага дархан цаазат газарт хууль бусаар ашигт малтмалын хайгуул хийх боломж олгож, хяналт шалгалтгүйгээр нэвтрэх чиглэл өгсөн Хилийн цэргийн хоёр албан тушаалтанд шүүхээс хорих ял оноожээ. Тодруулбал, Я.Т нь Дорноговь аймгийн Хатанбулаг сум дахь Хилийн цэргийн ангийн захирагчаар ажиллаж байхдаа 2022 оны наймдугаар сарын 18-нд Б.Д, Д.А, Т.Г нарт хууль бусаар ашигт малтмалын хайгуул хийх боломж олгож, Говийн бага дархан цаазат газарт хяналт шалгалтгүйгээр нэвтрүүлэх чиглэлийг сургалтын орлогч М.Ц-д өгсөн хэрэгт холбогдсон байна.

Прокуророос Я.Т, М.Ц нарыг Эрүүгийн хуулийн 22.1 дүгээр зүйлийн 1 дэх хэсэгт заасан эрх мэдэл, албан тушаалын байдлаа урвуулан ашиглах гэмт хэрэгт буруутган шүүхэд шилжүүлжээ.

Харин Б.Д, Д.А, Т.Г нар тусгай зөвшөөрөлгүйгээр ашигт малтмалын хайгуул, олборлолт явуулж, байгаль орчинд 2.7 сая төгрөгийн хохирол учруулсан хэрэгт Эрүүгийн хуулийн 24.2 дугаар зүйлийн 1 дэх хэсэгт зааснаар яллагдсан байна. Шүүхээс Хилийн цэргийн ангийн захирагчаар ажиллаж байсан Я.Т, сургалтын орлогч М.Ц нарыг эрх мэдэл, албан тушаалын байдлаа урвуулан ашиглах гэмт хэрэг үйлдсэн гэм буруутайд тооцож, нийтийн албанд томилогдох эрхийг тус бүр гурван жилийн хугацаагаар хасжээ. Мөн Я.Т-д нэг жил зургаан сар, М.Ц-д нэг жилийн хорих ял оноосон байна.

Хууль бусаар ашигт малтмал хайж, олборлосон Б.Д-г 10 сая төгрөгөөр, Д.А болон Т.Г нарыг тус бүр 5.4 сая төгрөгөөр торгох ял шийдвэрлэжээ.

Шүүгдэгч нараас байгаль орчинд учруулсан 2.7 сая төгрөгийн хохирол, нөхөн сэргээлтийн зардалд 314 мянган төгрөг гаргуулж, гэмт хэрэг үйлдэхдээ ашигласан тээврийн хэрэгслийн 257 сая төгрөгийн үнэлгээг хувь тэнцүүлэн гаргуулж, улсын орлого болгохоор шийдвэрлэсэн байна.

Булган аймагт гарсан ойн түймрийг бүрэн унтраалаа

zulaa — Mon, 12 Oct 2026 09:55:02 +0800

Булган аймгийн Сайхан сумын Ундрах багийн Тайгын өвөр гэх газарт аравдугаар сарын 8-ны өдрийн 13:48 цагт ойн түймэр гарчээ. Түймрийг өнөөдөр буюу аравдугаар сарын 9-ний 09:15 цагт бүрэн унтраасан байна.

Түймрийг унтраах ажиллагаанд аймгийн Онцгой байдлын газрын Булган сум дахь 20 дугаар анги болон сумын Мэргэжлийн ангийн алба хаагчид оролцжээ.

Урьдчилсан байдлаар ойн түймэрт 0.7 га талбай өртсөн байна.

Хэлтгийн цагаан нуурыг 21 жилийн дараа сэргээлээ

zulaa — Thu, 08 Oct 2026 15:44:51 +0800

Монгол Улсын Ерөнхийлөгч Ухнаагийн Хүрэлсүх Өвөрхангай аймгийн Хархорин суманд ажиллаж байна. Ерөнхийлөгчийн “Цэнхэр алт”, “Нэг сум-Нэг нуур-333 нуур” санаачилгын хүрээнд Хархорум хотын Захирагчийн Ажлын алба, “Хайдродизайн прожект” ХХК, холбогдох бусад байгууллага хамтран “Хэлтгийн цагаан нуур”-ыг сэргээх төсөл хэрэгжүүлж байгаа юм.

Энэ хүрээнд усны эко системийг сэргээх, хамгаалах, байгальд ээлтэй дэд бүтэц бий болгох, нуур, цөөрөм үүсгэх, нөхөн сэргээх, гадаргын усыг хуримтлуулах үе шаттай ажил хийж байна.

Тухайлбал, 1956 онд Хархорин суманд баригдсан ч ашиглахаа болиод удсан 17 км усалгааны суваг, шуудууг бүрэн цэвэрлэж, Хөгшин Орхон голоос 5.4 км шороон суваг татжээ.

Ингэснээр 80 га талбайд сэргэсэн нуурын ус сувгаар дамжин Хөгшин Орхон голд, Хөгшин Орхон гол нь Өгий нуурыг тэжээн Орхон голд эргэж цутгах юм байна. “Нуур сэргэсэн нь НҮБ-ын уур амьсгалын өөрчлөлт, цөлжилттэй тэмцэх зорилтод манай улс хувь нэмрээ оруулж байгаагийн нэг илрэл. Мал, амьтан, нүүдлийн шувуу олноор цуглах гээд экосистем бүрдэж байна. Цаашид дээрх гол, нуурын байгалийн урсацыг сэргээж, орчныг нь иж бүрэн тохижуулна. Хэлтгийн цагаан нуур нь Шинэ Хархорум хотын усан хангамжид чухал нөлөө үзүүлнэ” гэж Усны газрын дарга З.Батбаяр хэллээ. Тохижилт, нөхөн сэргээлт нь Хархорум хотын төлөвлөлт, бүтээн байгуулалтын хүрээнд ногоон байгууламжийг нэмэгдүүлэх, гадаргын усны нөөцийг хамгаалах, экосистемийн тэнцвэрийг хангах зорилттой уялдаж байна.

Усны нөөцийн зөвлөл шинэ Хархорум хотын хүн амын унд, ахуйн усны эх үүсвэрийг тогтоох хайгуулын судалгааны дүнг үндэслэн газрын доорх усны ордын нөөцийг 25 жилийн хугацаатайг өнгөрсөн жил баталсан юм. Монгол Улсын Ерөнхийлөгч У.Хүрэлсүхийн санаачилгаар өмнө нь “Цэнхэр алт” үндэсний хоёр чуулган зохион байгуулсан. Чуулганаар “Нэг нуур-Нэг сум-333 нуур”, “Дусал бүр” уриалга гаргасныг орон даяар хэрэгжүүлж, үр дүнд хүрч байгаагийн нэг жишээ нь “Хэлтгийн цагаан нуур”-ыг сэргээх төсөл юм.

Авлигатай тэмцэх газрын ажлын хэсэг Баян-Өлгий аймагт албан томилолтоор ажиллаж эхэллээ

zulaa — Mon, 05 Oct 2026 14:41:24 +0800

Авлигатай тэмцэх газрын Хяналт шалгалт, дүн шинжилгээний хэлтсийн дарга, эрхэлсэн комиссар М.Даваатогтохоор ахлуулсан ажлын хэсэг 2026 оны 10 дугаар сарын 5-ны өдрөөс Баян-Өлгий аймаг дахь албан томилолтыг эхлүүллээ. Монгол Улсын Ерөнхийлөгч, Үндэсний аюулгүй байдлын зөвлөлийн тэргүүн У.Хүрэлсүхийн өгсөн чиглэлийг хэрэгжүүлэх хүрээнд Авлигатай тэмцэх газрын ажлын хэсэг дараах ажил, арга хэмжээг авч хэрэгжүүлнэ. Үүнд:

Хуулиар харьяалуулсан авлигын гэмт хэрэг, гомдол мэдээлэлд холбогдох мөрдөн шалгах ажиллагааг явуулах, хянан шийдвэрлэх;
Авлигын эсрэг хуулийн 6 дугаар зүйлийн 6.1 дэх хэсгийг үндэслэн авлигаас урьдчилан сэргийлэх үйл ажиллагааны хүрээнд төрийн байгууллагуудын авлигын эсрэг үйл ажиллагааны төлөвлөлт, түүнийг хэрэгжүүлэхэд мэргэжил арга зүйн зөвлөгөө өгөх, хууль тогтоомжийн хэрэгжилтэд хяналт тавих, зохион байгуулах, дүрэм журмыг хянаж, зөвлөмж өгөх;
Авлигын эсрэг хуулийн 9 дүгээр зүйлийн 9.2 дахь хэсэг, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 28 дугаар зүйлийн 28.1.2 дахь заалтыг үндэслэн аж ахуйн нэгж, байгууллага, иргэнээс ирсэн авлига, ашиг сонирхлын зөрчилтэй холбоотой болон бусад хууль тогтоомжийг зөрчсөн гомдол, мэдээллийг хянан шалгах;
Авлигатай тэмцэх үндэсний хөтөлбөрийн хэрэгжилтэд хяналт тавих.

Авлигатай тэмцэх газрын ажлын хэсэг шаардлагатай төрийн байгууллага, хууль сахиулах байгууллага, нутгийн захиргааны болон нутгийн өөрөө удирдах байгууллага, албан тушаалтантай харилцан мэдээлэл солилцож, хамтран ажиллана. Ажлын хэсгийн Баян-Өлгий аймаг дахь албан томилолтын хүрээнд хэрэгжүүлсэн арга хэмжээ, явц, үр дүнгийн талаар тухай бүрд мэдээлэх болно.

Ерөнхийлөгч У.Хүрэлсүх Булган аймгийн иргэдтэй уулзлаа

zulaa — Mon, 05 Oct 2026 08:25:50 +0800

Монгол Улсын Ерөнхийлөгч Ухнаагийн Хүрэлсүх Булган аймагт ажиллаж байна. Ерөнхийлөгчийг Цогт хунтайжийн талбайд хүрэлцэн ирэхэд Булган цэргийн хүрээний хүндэт харуул угтаж авлаа.

Ерөнхийлөгч, Монголын ард түмний цогтой эх орончид, төр, нийгмийн нэрт зүтгэлтнүүд, эх орныхоо эрин зууны хөгжлийг түүчээлэн манлайлагч, анхдагч, эрдэмтэн мэргэд, урлаг, спортын алдартнуудын өлгий Булган нутгийн иргэдтэй уулзаж байгаадаа баяртай байгаагаа илэрхийлэв.

Тэрбээр бодлого, үйл ажиллагаа, гадаад харилцаа, улсын нийгэм, эдийн засгийн өнөөгийн байдал, “Тэрбум мод”, “Хүнсний хувьсгал”, “Цагаан алт”, “Ерөнхийлөгчийн илгээлт-2100”, “Эрүүл монгол хүн” хөдөлгөөн, хөтөлбөрийн үр дүнгийн талаар товч танилцууллаа.

Эдийн засаг 6.8 хувиар өсөн, нэг хүнд ногдох Дотоодын нийт бүтээгдэхүүн 7,000 ам.доллар давж, худалдаа, хөрөнгө оруулалт нэмэгдэн, гадаад валютын нөөц 7 тэрбум ам.доллар болж, 745 мянган тн үр тариа, ургац хураан авсанд Булган аймгийн төр, захиргааны байгууллага, хувийн хэвшил, иргэдийн хувь нэмэр их байсныг тэмдэглэв.

Гадаад харилцаа өргөжин, 21 улсын төрийн тэргүүн айлчилж, улсын нэр хүнд олон улсын тавцанд өсөн бэхэжсэн жилүүд болж байгааг онцоллоо.

“Цагаан алт” хөтөлбөрийн дүнд самнасан ноолуурын экспорт гэхэд л 5 дахин өсөж 330 сая ам.долларт хүрсэн.

“Хүнсний хувьсгал” хөдөлгөөний хүрээнд 53 хүнсний үйлдвэр шинээр ашиглалтад орж, 1,000 гаруй нэр төрлийн хүнсний бүтээгдэхүүнийг шинээр үйлдвэрлэж, зах зээлд нийлүүлдэг болсон. Булган аймагт гэхэд 32 аж ахуйн нэгж, 63 иргэн 7.7 тэрбум төгрөгийн хөнгөлөлттэй зээл авч хүчин чадал, бүтээгдэхүүний нэр төрөл, ажлын байраа нэмэгдүүлсэн байна.

“Тэрбум мод” үндэсний хөдөлгөөнийг эхнээс нь дэмжин 20 сая мод тарьж, ургуулах амлалтаа үе шаттай хэрэгжүүлж байгаад Ерөнхийлөгч талархал илэрхийлэв.

Цаашид эрчим хүч, нефтийн бүтээгдэхүүн, хүнс, цемент, ган, бордооны хэрэгцээг дотоодоосоо хангаж, улмаар экспортлогч орон болоход хүн бүрийн оролцоо, хичээл зүтгэл чухал байгааг тэмдэглэлээ.

Огтолсон модныхоо оронд ойд мод тарих: Архангайд хэрэгжиж буй шинэ арга хэмжээ

zulaa — Wed, 30 Sep 2026 11:42:38 +0800

Архангай аймгийн Прокурорын газар сүүлийн гурван жилийн хугацаанд хүрээлэн буй орчны эсрэг үйлдсэн 136 гэмт хэргийг хянан шийдвэрлэжээ. Эдгээр хэргийн 85 орчим хувь нь хууль бусаар мод бэлтгэсэнтэй холбоотой байна.

Хууль бусаар мод бэлтгэх гэмт хэрэг тус аймгийн Булган, Ихтамир, Цэнхэр, Тариат, Өндөр-Улаан сумдад харьцангуй их бүртгэгджээ. Иргэд ахуйн хэрэгцээндээ мод бэлтгэхдээ зохих зөвшөөрөл аваагүй, зөвшөөрсөн хэмжээнээс хэтрүүлсэн зэрэг шалтгаанаар эрүүгийн хэрэгт холбогдож байгаа аж.

Зохих зөвшөөрөлгүйгээр ой, ойн сан бүхий газарт ургасан модыг огтлох, хөрөөдөх, таслах, үндэстэй нь сугалах, унанги мод түүх зэрэг үйлдлээр ойн санд хохирол учруулсан тохиолдолд эрүүгийн хариуцлага хүлээлгэдэг. Мөн зөвшөөрөлтэй байсан ч тогтоосон хугацаа, хэмжээ, байршлыг зөрчиж мод бэлтгэсэн бол хуулийн хариуцлага хүлээнэ.

Хууль бусаар мод бэлтгэсэн тохиолдолд Эрүүгийн хуульд зааснаар 450 мянгаас 5.4 сая төгрөгөөр торгох, 240-720 цаг нийтэд тустай ажил хийлгэх, эсхүл нэг сараас нэг жил хүртэл хугацаагаар зорчих эрхийг хязгаарлах ял шийтгэл оногдуулж болно.

Харин уг гэмт хэргийг давтан үйлдсэн, бүлэглэн үйлдсэн, төрийн албан хаагч оролцсон, эсхүл тусгай хамгаалалттай газар нутгаас мод бэлтгэсэн тохиолдолд эрүүгийн хариуцлага хүндрэхээр хуульд заасан байна.

Огтолсон модныхоо оронд мод тарих арга хэмжээ

Архангай аймгийн Прокурорын газраас хууль бусаар мод бэлтгэсэн этгээдэд үндсэн ял шийтгэлийнх нь хамт мод тарих албадлагын арга хэмжээ авах саналыг шүүхэд гаргаж байгаа аж.

Тус аймгийн шүүх уг саналыг хүлээн авч, мод бэлтгэж байгаль орчинд хохирол учруулсан хүмүүст үндсэн ялтай нь хамт мод тарих албадлагын арга хэмжээ оноож эхэлжээ.

Ингэснээр зөвхөн ял шийтгэл хүлээлгэхээс гадна байгаль орчинд учруулсан хохирлыг биечлэн нөхөн сэргээхэд оролцуулах зорилготой юм. Үүнээс гадна хууль бусаар бэлтгэсэн мод болон байгалийн баялгийг хурааж, гэмт хэрэг үйлдэхэд ашигласан техник, хэрэгслийг улсын орлого болгодог. Байгаль орчинд учруулсан хохирлыг хуульд заасны дагуу гурав дахин нэмэгдүүлэн нөхөн төлүүлдэг байна.

Сүүлийн гурван жилийн хугацаанд Архангай аймагт бүртгэгдсэн дээрх төрлийн гэмт хэргийн улмаас байгаль орчинд нийт 55.3 сая төгрөгийн хохирол учирчээ. Мөн бэлтгэсэн мод, ашигласан техник, тээврийн хэрэгсэл зэрэг нийт 539.7 сая төгрөгийн үнэ бүхий 804 эд хөрөнгийг битүүмжилж, хохирол нөхөн төлүүлэх болон улсын орлого болгох арга хэмжээ авчээ.